Mathais 18:35

35Yexus xaus lus hais tias, Yog nej cov kwvtij ib leeg tsis zam txim rau ib leeg tiag tiag, kuv Txiv uas nyob saum Ceebtsheej yuav ua ib yam nkaus li ntawd rau nej thiab.

Chivkeeb 2:24

24Twb yog vim li ntawd tus txivneej thiaj tso nws niam nws txiv tseg mus nrog nws tus pojniam nyob ua txij ua nkawm, nkawd thiaj koom ua ib tug

Mathais 19:4-9

Peb kevcai puas pub ib tug txivneej twg cia li nrauj nws tus pojniam raws li nws siab nyiam? 4Yexus teb hais tias, Nej tsis tau nyeem Vajtswv phau ntawv, zaj uas hais txog thaum chivkeeb Vajtswv tsim txivneej thiab pojniam los? 5Nws hais tias, Twb yog vim li no tus txivneej nws thiaj tso nws niam nws txiv tseg mus nrog nws tus pojniam nyob ua txij ua nkawm, nkawd ob leeg yuav koom ib lub cev. 6Nkawv tsis yog ob leeg lawm, tiamsis yog ib leeg xwb. (Chivkeeb 2:24) Vajtswv twb muab nkawd los ua niamtxiv lawm, yog li ntawd neeg tsis txhob muab nkawd cais. 7Cov Falixais rov nug Yexus hais tias, Yog li ntawd ua cas Mauxes ho hais tias, yog tus txiv ua ntawv nrauj rau tus pojniam, cais nrauj tau? 8Yexus teb hais tias, Tos li Mauxes pub nej nrauj pojniam los, twb yog vim nej tawvncauj, tsis muaj neeg hais tau. Tiamsis thaum chivkeeb yeej tsis muaj li ntawd. 9Kuv qhia rau nej hais tias, yog leejtwg tus pojniam tsis tau mus nrog hluasnraug ua kev pleesyig, nws cia li muab nrauj lawm, yog nws mus yuav dua pojniam tshiab twb yog nws nrogluag poj luag sev ua pleesyig.

Mathais 19:17-19

Kuv yuav tsum ua yam dabtsi twg zoo, Vajtswv thiaj pub txojsia ntev mus ib txhis rau kuv? 17 Yexus teb hais tias, Ua li cas koj nug kuv hais txog yam uas zoo? Yeej muaj tib tug zoo xwb. Yog koj xav tau txojsia koj yuav tsum coj raws li Vajtswv tej lus samhwm. 18Tus ntawd rov nug Yexus hais tias, Ua li ais yog tej nqi lus samhwm twg? Yexus teb hais tias, Yog tej nqi uas hais tias, 1 . Tsis txhob tua neeg 2 . Tsis txhob ua kev pleesyig 3 . Tsis txhob ua tubsab 4 . Tsis txhob ua timkhawv tsis tseeb 5 . Yuav tsum hwm koj niam koj txiv 6 . Thiab yuav tsum hlub kwvtij zejzog ib yam li koj hlub koj lub cev (Khiavdim 20:12-16; Levis- Kevcai 19:18).

Mathais 19:29-30

29 Txhua tus uas tso vaj tso tsev, tso kwv tso tij, tso nkauj tso muam tseg, tso niam tso txiv, tso metub menyuam, thiab tso liaj tso teb tseg vim nws ua kuv txoj haujlwm, tus ntawd yuav tau tshaj cov uas nws twb tso tseg lawm ib puas npaug, thiab nws yuav tau txojsia ntev mus ib txhis. 30 Tiamsis muaj ntau tus uas nimno ua cov thawj, lawv yuav rov mus nyob tom tw. Thiab cov uas nimno nyob tom tw yuav tau los ua cov thawj.

Mathais 20:17-19

Zaum 3 uas Yexus qhia txog nws txojkev tuag. 17Thaum Yexus lawv tabtom taug kev mus nram lub nroog Yeluxalees, nws qhia nws kaum ob tug thwjtim xwb. 18Nws hais tias, Nej ua zoo mloog os, peb tabtom mus nram lub nroog Yeluxalees. Nyob nrad yuav muaj neeg ntes Neeg Leejtub coj mus cob rau cov povthawj, thiab cov neeg uas qhia Vajtswv txoj kevcai txhais tes. Lawv yuav txiav txim coj nws mus tua povtseg. 19Lawv yuav muab nws cob rau lwm haivneeg, lwm haivneeg yuav ua saib tsis taus nws, lawv yuav muab nws nplawm, thiab muab nws ntsia rau saum ntoo khaublig. Tomqab ntawd peb tagkis Vajtswv yuav tsa nws sawv hauv qhovtuag rov qab los.

Mathais 20:26-28

Yog nej cov leejtwg xav ua tus hlob , tus ntawd yuav tsum ua nej tus tubqhe. 27 Thiab yog nej cov leejtwg xav ua tus thawj, tus ntawd yuav tsum ua nej qhev. 28 Ib yam li Neeg Leejtub, nws los, nws tsis tau kom leejtwg tu nws, tiamsis nws los tu sawvdaws thiab muab nws txojsia los txhiv ntau leej.

Mathais 22:14

Vajntxwv Yuav Nyab Rau Nws Tus Tub (Mathais 22:1-13) 14 Yexus xaus lus hais tias, Cov neeg uas Vajtswv twb caw lawm muaj coob tiag, tiamsis cov uas nws xaiv muaj tsawg.

Mathais 22:36-39

36Nws nug hais tias, Xibhwb, Vajtswv txojcai nqi twg yog nqi tseemceeb dua ntais huv tibsi? 37Yexus teb hais tias, Nej yuav tsum mloog Vajtswv tus uas yog nej tus Tswv lus kawg siab kawg ntsws, kawg plab kawg plawv ( Kevcai 6:5 ). 38Nqi no yog nqi tseemceeb dua ntais. 39 Nqi ob kuj tseemceeb thiab. Nqi ntawd hais tias, Nej yuav tsum hlub kwvtij zejzog ib yam li nej hlub nej lub cev ( Levis-Kevcai 19:18 ).

Mathais 23:9-10

9 Nej tsis txhob hu ib tug neeg twg hauv ntiajteb no hais tias, Txiv, rau qhov nej tsuas muaj tib leeg Txiv xwb, tus ntawd yog tus nyob saum Ceebtsheej. 10Thiab tsis txhob pub leejtwg hu nej hais tias, Yawg hlob, rau qhov nej tsuas muaj tib tug Yawg hlob xwb, tus ntawd yog tus Mexiyas .

Mathais 23:12

12Tus uas tsav hwjchim, Vajtswv yuav txo tus ntawd lub hwjchim. Tus uas txo hwjchim, Vajtswv yuav tsav tus ntawd lub hwjchim.

Mathais 23: 13-36

13 Cov neeg qhia Vajtswv txoj kevcai, thiab cov Falixais uas siab phem es, nej yuav raug txim, rau qhov: 1 . Nej kaw qhovrooj tsis pub leejtwg los ua Vajtswv haivneeg. Txawm yog nej los, nej twb tsis los, nej tseem txwv tsis pub cov neeg uas xav los los thiab. 2 . Nej txeeb cov pojntsuam tej vajtse los ua nej tug, thiab nyiam sawvntsug thov Vajtswv ntev ntev kom sawvdaws qhuas nej. Vim li ntawd nej yuav raug txim hnyav dua sawvdaws. 3 . Nej hla dej, nej nce toj, nqis taug mus nrhiav kom tau ib tug los coj nej txoj kevcai. Tiamsis thaum nej nrhiav tau ib tug lawm, nej ua rau tus ntawd haj yam tsimnyog raug txim rau hauv ntujtawg ob npaug nej. 4 . Nej so khob, so tais sab nraud huvsi, tiamsis sab hauv ntim puv nkaus tej uas nej mus ua nruj ua tsiv tau los. 26Cov Falixais uas digmuag es, nej yuav tsum xub ntxuav sab khob hauv tso, sab nraud thiaj li yuav huv thiab. 5 . Nej zoo ib yam li lub ntxa uas pleev hmoov zeb sib, sab nraud zoo zoo dawbpaug, tiamsis sab hauv puv nkaus pobtxha neeg tuag, thiab tsw lwj ntxiag xwb. 28Nej lub siab phem ib yam nkaus li ntawd. Luag saib sab nraud, luag xav hais tias, nej yog neeg zoo, tiamsis hauv nej lub siab puv nkaus kev dag thiab kev txhaum. 6 . Nej txhim cov neeg cev Vajtswv lus tej ntxa zoo zoo nkauj, thiab ua rau tej pej thuam uas neeg puab nco txog cov neeg ncajncees thaum ub, zoo nkauj. 30Nej hais tias, yog peb nyob tiam uas peb pojkoob yawmtxwv nyob, peb yuav tsis nrog lawv tua cov neeg cev Vajtswv lus. 31Nej hais li ntawd twb yog nej lees hais tias, nej yog cov neeg uas tua cov neeg cev Vajtswv lus ntawd cov xeebntxwv ntag los sav. 32Nej cia li ua tej uas nej pojkoob yawmtxwv twb ua tseg lawm kom tiav los mas. 33Cov niag nab thiab nab cov niag tub es, nej xav hais tias, nej yuav tsis poob rau hauv ntujtawg no los? 34Kuv qhia rau nej hais tias, kuv yuav txib cov neeg cev Vajtswv lus, cov neeg muaj tswvyim, thiab cov neeg qhia kevcai tuaj qhia nej. Nej yuav muab cov neeg ntawd qee leej tua povtseg, yuav muab qee leej ntsia rau saum ntoo khaublig, yuav muab qee leej nplawm hauv nej tej tsev sablaj, thiab muab lawv ntiab khiav ib lub nroog mus dhau ib lub nroog. 35Vim li ntawd nej yuav tsum ris cov neeg uas tua cov uas tsis tau ua txhaum lub txim. Txij puag thaum lawv tua tus Anpees uas tsis tau ua txhaum, los txog thaum nej tua Npalakiyas tus tub Xakhaliyas ntawm lub Tuamtsev, thiab lub thaj theej txhoj kis nruabnrab. 36Kuv qhia tseeb rau nej hais tias, cov neeg txheej no yuav tsum ris cov neeg uas ua li ntawd lub txim huv tibsi.

Mathais 23:16-22

16 Cov neeg digmuag uas coj lwm tus kev es , nej yuav raug txim. Nej qhia hais tias, 1 . yog leejtwg twv txog lub Tuamtsev, tsis tas nws yuav ua raws li nws twv ntawd los kuj tau. Tiamsis yog nws twv txog tej nyiajkub uas nyob hauv lub Tuamtsev, nws yuav tsum ua raws li nws tej lus twv. 17 Cov neeg digmuag uas ruam es, yam twg tseemceeb dua, nyiajkub lossis lub Tuamtsev. Twb yog lub Tuamtsev ua rau cov nyiajkub ntawd muaj hwjchim los sav. 2 . 18Thiab nej tseem qhia hais tias, yog leejtwg twv txog lub thaj theej txhoj , tsis tas nws yuav ua raws li nws twv ntawd los kuj tau. Tiamsis yog nws twv txog tej qhovtxhia chaw uas nyob saum lub thaj , nws yuav tsum ua raws li tej lus nws twv. 19Cov niag neeg digmuag es, yam twg tseemceeb dua, tej qhovtxhia chaw uas nyob saum lub thaj lossis lub thaj? Twb yog lub thaj ua rau tej qhovtxhia chaw ntawd muaj hwjchim los sav. 20Yog li ntawd thaum ib tug neeg twg twv txog lub thaj theej txhoj, nws yeej twv txog lub thaj, thiab tej qhovtxhia chaw saum lub thaj huv tibsi. 21Thiab thaum ib tug neeg twg twv txog lub Tuamtsev, twb yog nws twv txog lub Tuamtsev, thiab tus Vajtswv uas nyob hauv lub Tuamtsev ntawd ntag. 22Thiab thaum ib tug neeg twg twv txog lub ntuj, twb yog nws twv txog Vajtswv lub roojzaum, thiab tus uas zaum saum lub rooj ntawd.

Mathais 24:3-14

3Thaum Yexus zaum puag pem roob ntoo ntseej, Yexus cov thwjtim los cuag Yexus twjywm tsis pub leejtwg paub. Lawv nug Yexus hais tias, Thov koj qhia rau peb paub hais tias, thaum twg mam li muaj tej no. Thiab yuav muaj yam twg qhia rau peb paub tseeb hais tias, twb txog lub sijhawm uas koj yuav los, thiab twb txog lub sijhawm ntiajteb yuav kawg. 4Yexus teb hais tias, Nej yuav tsum ceevfaj, tsis txhob pub leejtwg ntxias tau nej yuamkev. 1 . 5 Yuav muaj ntau leej neeg tuav kuv lub npe dag hais tias, lawv yog tus Mexiyas. Thaum ntawd yuav muaj ntau leej neeg ntseeg lawv tej lus. 2 . 6 Nej yuav hnov suab ntaj suab riam ua rog ze ze nej , 3 . thiab yuav hnov moo hais tias, tej tebchaws nyob deb ua tsov ua rog . Thaum nej hnov li ntawd nej tsis txhob poobsiab. Yeej yuav muaj tej ntawd tiamsis tsis tau hais tias, twb txog hnub kawg lawm. 4 . 7 Ib lub tebchaws yuav sawv tawmtsam ib lub tebchaws , 5 . thiab ib haivneeg yuav sawv tawmtsam ib haivneeg. 6 . Yuav muaj kev tshaib kev nqhis, 7 . thiab yuav muaj av qeeg txhua qhov . 8Tej ntawd piv ib yam li tus pojniam uas nyuam qhuav pib mob plab yuav yug menyuam. 9Thaum ntawd yuav muaj neeg ntes nej coj mus tsimtxom, thiab lawv yuav muab nej tua povtseg. Sawvdaws yuav ntxub nej vim nej yog kuv cov. 10Lub sijhawm ntawd yuav muaj ntau leej tso kev ntseeg tseg, lawv ib tug yuav ntxeev siab rau ib tug, thiab ib tug yuav ntxub ib tug. 11Yuav muaj cov cev Vajtswv lus cuav ntau leej tuaj dag neeg coob coob yuamkev. 12Thaum tej kev phem huam loj heev, sawvdaws yuav tsis txawj sib hlub zujzus lawm. 13Tiamsis tus uas ua siab ntev mus txog hnub kawg, tus ntawd yuav dim. 14Thaum muaj neeg qhia Txojmoo zoo uas hais tias, Vajtswv yuav los kav neeg lub siab mus thoob plaws qabntuj rau sawvdaws paub lawm, cais thaum ntawd twb yuav txog lub sijhawm kawg.

Mathais 24:29-31, (Neej Leejtub Yuav Los)

29Thaum tej kev txomnyem ntawd dhau lawm, lub hnub yuav tsaus, lub hli yuav tsis ci. Cov hnubqub saum nruabntug yuav zeeg, thiab ib puas tsav yam muaj hwjchim saum nruabntug yuav ua zog koog tas huv tibsi. 30Thaum ntawd yuav muaj ib yam ua lub cim tshwm saum nruabntug qhia hais tias, Neeg Leejtub tabtom los. Txhua haivneeg hauv qabntuj no yuav quajnyiav ntsoog qees thaum lawv pom Neeg Leejtub nrog huab nrog cua los, nws lub hwjchim ci ntsa iab. 31Yuav muaj suab raj kubtwg nrov. Neeg Leejtub yuav txib nws cov tubtxib saum qaumntuj mus txhua nrho plaub ceg kaumntuj hu cov neeg uas nws twb xaiv cia lawm, puag pem hauvntuj mus txog puag nram qabntuj kawg los nyob ua ke.

Mathais 24:36-44, (Tsis Muaj Leej Twg Paub Caij Nyoog)

36Tiamsis hnub ntawd thiab lub sijhawm ntawd tsis muaj leejtwg paub, txawm yog cov tubtxib saum qaumntuj los yog, Neeg Leejtuba los yog, lawv yeej tsis paub li tsuas yog Leejtxiv tib leeg thiaj paub xwb. 37Lub sijhawm Neeg Leejtub rov qab los yuav zoo ib yam li lub sijhawm Nau-as nyob. 38Thaum dej tseem tsis tau nyab ntiajteb, sawvdaws ua noj ua haus, ua tshoob ua kos mus txog hnub Nau-as nce mus hauv lub nkoj. 39Tej neeg tsis nco qab ceevfaj, dej cia li los nyab thiab kuav lawv mus tas huv tibsi. Thaum Neeg Leejtub rov qab los yuav zoo ib yam nkaus li ntawd ntag. 40Lub sijhawm ntawd muaj ob tug txivneej ua haujlwm ua ke tom teb. Luag yuav coj ib tug mus, yuav tseg ib tug cia. 41Muaj ob tug pojniam zom zeb ua ke, luag yuav coj ib tug mus, yuav tseg ib tug cia. 42Yog li ntawd nej yuav tsum ceevfaj zov tos, rau qhov nej tsis paub hais tias, lub sijhawm twg nej tus Tswv yuav los. 43Kuv qhia rau nej hais tias, yog tus tswv tsev xub paub ua ntej lawm hais tias, thaum twg tubsab yuav tuaj, nws yeej yuav zov tos tsis pub tubsab tuaj tsoo nws vaj nws tsev los hauv tsev. 44Txawm yog nej los, nej yuav tsum npaj rawv tos thiab, rau qhov lub sijhawm uas nej tsis nco ceevfaj, Neeg Leejtub yuav los lub sijhawm ntawd ntag.

Mathais 25:33-36

33Nws yuav coj cov neeg uas ua raws li Vajtswv lub siab nyiam los nyob ntawm nws sab xis, thiab coj cov neeg uas tsis ua raws li Vajtswv lub siab nyiam los nyob ntawm nws sab laug. 34Nws yuav hais rau cov neeg uas nyob ntawm nws sab xis hais tias, Nej cov uas tau kuv txiv txoj koobhmoov, nej cia li los nyob lub tebchaws uas nws twb npaj cia rau nej puag thaum tsis tau tsim ntuj tsim teb los lawm. 35Thaum kuv tshaib plab nej muab mov rau kuv noj. Thaum kuv nqhis dej nej muab dej rau kuv haus. Txawm yog nej tsis paub kuv los, nej tseem hu kuv los so hauv nej tsev. 36Thaum kuv tsis muaj tsoostsho hnav nej muab rau kuv hnav. Thaum kuv muaj mob muaj nkeeg nej tuaj tu kuv. Thaum kuv raug kaw hauv tsev lojcuj nej tuaj xyuas kuv.

Levis-Kevcai 19:18

18 Nej tsis txhob ua phem pauj phem lossis pheej ntxub luag tsis tseg. Nej yuav tsum hlub nej tej neeg zejzog ib yam nkaus li nej hlub nej lub cev. Kuv yog tus TSWV.

Kevcai 6:5

5 Nej yuav tsum muab siab npuab tus TSWV uas yog nej tus Vajtswv kawg siab kawg ntsws, kawg plab kawg plawv, thiab kawg nej lub dag lub zog.