Mathais 15:3

3Yexus teb hais tias, ua li cas nej ua raws li nej txojlus qhia, tiamsis nej ho tsis ua raws liVajtswv txojlus qhia.

Mathais 15:8

8Vajtswv hais tias, cov neeg no lub ncauj hwm kuv, tiamsis lawv lub siab tsis npuab kuv.

Yaxayas 29:13

13Tus Tswv hais tias, Tej neeg no khav hais tias, lawv pehawm kuv tiamsis lawv tsis hais lus tseeb, lawv lub siab tsis npuab kuv. Lawv tsuas coj raws li tej kabke uas neeg rhawv tsim, thiab hais raws li tej kevcai uas lawv cim rau nruabsiab xwb.

Mathais 15:9

9 Lawv pehawm kuv tsis muaj nujnqis dabtsi li, rau qhov lawv muab neeg tej lus los qhia ib yam li tej lus ntawd yog kuv tej cai ntag. (Yaxayas 29:13)

Mathais 15:10, 15-20

10 Yexus hu tej neeg coob coob los cuag nws, nws hais rau lawv hais tias, Nej ua tib zoo mloog tej lus uas kuv hais, nej thiaj yuav totaub. 11Tsis yog yam uas mus hauv neeg lub qhovncauj ua rau neeg txhaum kevcai, tiamsis yog tej lus uas tawm hauv neeg lub qhovncauj tuaj ua rau neeg txhaum kevcai. 15 Petus hais tias, Thov koj txhais zaj lus pivtxwv ko rau peb mloog saib yog li cas. 16Yexus hais rau cov thwjtim hais tias, Nej thiab lawv puavleej tsis totaub ib yam nkaus los? 17Nej tsis paub los? Yam uas mus hauv neeg lub qhovncauj, yam ntawd mus hauv lub plab thiab tawm dhau lawm xwb. 18Tiamsis tej lus uas neeg hais tawm ntawm qhovncauj, puavleej yog tej uas tawm hauv lub siab tuaj. Tej lus ntawd ua rau neeg ua txhaum kevcai. 19Tej uas tawm hauv neeg lub siab tuaj, tej ntawd ua rau neeg hais lus phem, tua neeg, nrog luag poj luag txiv ua pleesyig, ua tubsab tubnyiag, hais lus dag, thiab rhuav luag plhu. 20Tej no yog tej uas ua rau neeg ua txhaum kevcai, tiamsis qhov uas tsis xub ntxuav tes mam li noj mov raws li lawv hais ntawd, yeej ua tsis tau rau neeg ua txhaum kevcai.

Mathais 15:13

13 Yexus teb hais tias, Kuv Txiv tus uas nyob saum Ceebtsheej yuav rho txhua tsob ntoo uas tsis yog nws cog povtseg. 14Puamchawj lawv los mas. Lawv yog cov thawj digmuag uas coj tej neeg digmuag kev. Yog ib tug digmuag coj ib tug digmuag kev, nkawd ob leeg yeej yuav poob qab ke.

Mathais 16:13-17 Neeg Leejtub yog leejtwg?

13Yexus mus pem lub xeev uas nyob ze ze lub nroog Xixaleyas Filipis. Thaum ntawd nws nug nws cov thwjtim hais tias, Tej neeg hais tias, Neeg Leejtub yog leejtwg ? 14Lawv teb hais tias, Muaj qee leej hais tias, nws yog tus Yauhas uas coj neeg ua kevcai raus dej . Qee leej hais tias, nws yog Eliyas , qee leej hais tias, nws yog Yelemis , lossis hais tias, nws yog ib tug cev Vajtswv lus ib yam li Yelemis. 15Yexus rov nug lawv hais tias, Ua li nej ne, nej ho hais tias, kuv yog leejtwg? 16Ximoos Petus teb hais tias, koj yog tus Mexiyas uas yog tus Vajtswv muaj sia zees nyob Leejtub.

Mathais 16:21

Thawj zaug uas Yexus qhia nws kev tuag, Yexus tseem nyob pem Xixaleyas Filipis. 21Txij thaum ntawd los Yexus pib qhia meej meej rau Yexus cov thwjtim hais tias, Kuv yuav tsum mus nram lub nroog Yeluxalees, cov txwjlaus, cov povthawj hlob thiab cov qhia Vajtswv txoj kevcai yuav tsimtxom kuv, thiab tua kuv rau nrad. Tiamsis peb tagkis Vajtswv yuav tsa kuv sawv hauv qhovtuag rov qab los.

Mathais 16:24-27

24Yexus qhia rau Yexus cov thwjtim hais tias, Yog leejtwg xav nrog kuv mus ua kuv tus thwjtim, tus ntawd yuav tsum tswj nws lub siab, thiab niajhnub kwv nws tus ntoo khaublig nrog kuv mus . 25Rau qhov tus uas khuvxim nws txojsia, tus ntawd txojsia yuav tu. Tiamsis tus uas ua kuv tes haujlwm nws tsis khuvxim nws txojsia, tus ntawd yuav tau txojsia ntev mus ib txhis. 26Yog leejtwg tau ib puas tsav yam hauv ntiajteb no huv tibsi los ua nws tug, tiamsis nws txojsia tu lawm, tej ntawd yuav muaj nujnqis dabtsi rau nws. Yeej tsis muaj ib yam dabtsi uas tus ntawd yuav coj mus pauv tau nws txojsia rov qab los. 27 Thaum Neeg Leejtub los, nws yuav muaj Leejtxiv lub hwjchim ci ntsa iab, thiab nws cov tubtxib saum qaumntuj yuav nrog nws los. Thaum ntawd nws yuav muab nqizog rau txhua tus raws li tes haujlwm uas lawv tau ua los lawm.

Mathais 17:20

20 Yexus teb hais tias, Twb yog vim nej tsis muab siab rau ntseeg nej thiaj ntiab tsis tau. Kuv qhia tseeb rau nej hais tias, yog nej muaj kev ntseeg luaj li ib lub noob zaub, nej hais rau lub roob no hais tias, Cia li txav ntawm no mus lwm qhov, cais lub roob ntawd yeej yuav txav mus raws li nej hais. Nej yuav ua tau txhua yam huv tibsi.

Mathais 17:22

Zaum 2 uas Yexus qhia nws kev tuag, Yexus nyob pem lub moos Kalena-us. 22Thaum Yexus thiab Yexus cov thwjtim tuaj nyob ua ke hauv Kalilais tebchaws, Yexus qhia lawv hais tias, Yeej yuav muaj neeg ntes Neeg Leejtub coj mus cob rau luag txhais tes. 23Lawv yuav muab nws tua, tiamsis peb tagkis Vajtswv yuav tsa nws sawv hauv qhovtuag rov qab los.

Mathais 18:2-5

Cov neeg uas Vajtswv kav lawm, leejtwg yog tus uas muaj hwjchim loj dua ntais? 2Yexus hu ib tug menyuam yaus los sawv ntawm cov thwjtim xubntiag. 3Yexus hais tias, Kuv qhia tseeb rau nej hais tias, yog nej tsis hloov nej lub siab kom zoo li ib tug menyuam yaus lub, cais Vajtswv yeej yuav tsis los kav nej lub siab. 4Tus uas muaj lub siab mos, siab muag li tus menyuam yaus no, tus ntawd yuav tau ua tus muaj hwjchim loj dua ntais hauv cov neeg uas Vajtswv kav lawm. 5Tus uas saib taus ib tug neeg twg uas muaj lub siab mos, siab muag li tus menyuam no, rau qhov nws ntseeg kuv, tus ntawd saib taus kuv.

Mathais 18:7

7 Tej neeg hauv ntiajteb no yuav raug txim, rau qhov muaj tej uas ua rau neeg yuamkev ua txhaum. Yeej yuav muaj tej ntawd los, tiamsis tus uas ua kom muaj tej ntawd tus ntawd yuav raug txim .

Mathais 18:8-9

8Yog koj txhais tes lossis koj txhais kotaw ua rau koj yuamkev ua txhaum, koj cia li muab txhais ntawd txiav povtseg.Yog koj tu ib sab tes lossis ib sab taw koj tau txojsia, zoo dua li qhov uas koj muaj tes muaj taw txhij zog ais koj poob rau hauv lub cubtawg uas cig tsis paub tuag mus ib txhis li. 9Thiab yog koj ib sab qhovmuag ua rau koj yuamkev ua txhaum, koj cia li muab sab ntawd kaus kiag povtseg. Koj puas ib sab qhovmuag koj tau txojsia, zoo dua li koj muaj ob sab qhovmuag ais koj poob rau hauv ntujtawg.

Mathais 18:10-11

10 Nej yuav tsum ceevfaj, tsis txhob saib tsis taus ib tug neeg twg uas muaj lub siab mos muag li cov menyuam yaus no. Kuv qhia rau nej hais tias, cov tubtxib saum qaumntuj uas ib txwm nyob ntawm kuv Txiv uas nyob saum Ceebtsheej lub xubntiag zov rawv lawv. [11Neeg Leejtub los cawm tej neeg uas yuamkev lawm kom lawv dim.]

Mathais 18:18

18Kuv qhia tseeb rau nej hais tias, yam uas nej txwv hauv ntiajteb no Vajtswv yuav txwv yam ntawd saum Ceebtsheej. Yam uas nej pub ua hauv ntiajteb no, Vajtswv yuav pub ua yam ntawd saum Ceebtsheej.

Mathais 18:19-20

19Kuv qhia ntxiv rau nej hais tias, yog nej cov uas nyob hauv ntiajteb no muaj ob leeg ua ib lub siab thov yam twg, kuv txiv uas nyob saum Ceebtsheej yuav pub yam ntawd rau nkawd. 20Yog kuv cov thwjtim ob peb leeg tuaj nyob ua ke qhovtwg, kuv yuav nrog lawv nyob qhov ntawd.