Mathais 10:28

28 Nej tsis txhob ntshai tus uas tua tau nej lub cev, tiamsis tua tsis tau nej tus ntsujplig. Nej yuav tsum ntshai tus Vajtswv uas muaj hwjchim muab tau nej lub cev, thiab nej tus ntsujplig pov rau hauv ntujtawg.

Mathais 10:32-33

32Tus uas lees tabmeeg sawvdaws hais tias, nws yog tus ntseeg kuv, cais kuv yuav tabmeeg qhia rau kuv Txiv uas nyob saum Ceebtsheej hais tias, tus ntawd yog kuv li. 33Tiamsis tus uas tabmeeg qhia rau sawvdaws hais tias, nws tsis ntseeg kuv, cais kuv yuav tabmeeg qhia rau kuv Txiv uas nyob saum Ceebtsheej hais tias, tus ntawd tsis yog kuv li.

Mathais 10:38

38Tus uas tsis kwv nws tus ntoo khaublig nrog kuv mus, tus ntawd tsis tsimnyog ua kuv tus thwjtim.

Mathais 10:39

39 Tus uas khuvxim nws txojsia, tus ntawd txojsia yuav tu, tiamsis tus uas ua kuv tes haujlwm nws tsis khuvxim nws txojsia, tus ntawd yuav tau txojsia.

Mathais 10:40-42 (Nqizog)

40Tus uas lees yuav nej, twb yog tus ntawd lees yuav kuv. Thiab tus uas lees yuav kuv, twb yog tus ntawd lees yuav tus uas txib kuv los. 41Tus uas lees yuav Vajtswv ib tug tubtxib rau qhov nws paub hais tias, tus ntawd yog tus uas qhia Vajtswv txojlus, cais nws yuav tau nqizog ib yam li tus tubtxib ntawd. Tus uas lees yuav ib tug neeg zoo rau qhov nws paub hais tias, tus ntawd yog neeg ncaj, cais nws yuav tau nqizog ib yam li tus ntawd. 42Kuv qhia tseeb rau nej hais tias, tus uas muab ib khob dej txiag rau kuv cov thwjtim, tus uas muaj meejmom yau dua sawvdaws huv tibsi haus, rau qhov nws paub hais tias, tus ntawd yog tus ntseeg kuv, nws yeej yuav tau nqizog.

Mathais 11:28

28Nej cov uas sab sab vim nej ris nra hnyav, nej cia li los cuag kuv, kuv yuav cia nej so.

Mathais 12:30

30 Tus uas tsis tuaj kuv tog, tus ntawd yeej tawmtsam kuv. Tus uas tsis pab kuv tav pab yaj los ua ke, tus ntawd yeej ua rau pab yaj nyias tawg nyias khiav ua sab ua sua.

Mathais 12:33

33 Tsob ntoo zoo yeej txi cov txiv zoo, tsob ntoo phem yeej txi cov txiv phem. Yog yus xav paub hais tias, tsob ntoo twg yog tsob phem lossis yog tsob zoo, yus yuav tsum pom cov txiv yus thiaj paub.

Mathais 12:35

35Tus neeg siab zoo nws yeej ua tej yam zoo, tus neeg siab phem, yeej ua tej yam phem.

Mathais 12:36

36 Kuv qhia rau nej hais tias, thaum txog hnub Vajtswv txiav txim, txhua tus nyias yuav tsum lees txhua lo lus tsis muaj hauvpaus hauvntsis uas nyias twb hais los lawm rau Vajtswv. 37 Qhov uas nej yuav raug txim lossis tsis raug, qhov ntawd nyob ntawm nej tej lus uas nej hais.

Mathais 12:50

50 Tus uas ua raws li kuv Txiv uas nyob saum Ceebtsheej lub siab nyiam, tus ntawd yog kuv kwv, yog kuv muam, thiab yog kuv niam.

Tus Tseb Nplej (Mathais 13: 3 - 8)

Yexus qhia ib zag hais tias, Muaj ib tug txivneej nqa nplej mus tseb. 4Thaum nws tabtom tseb cov nplej rau hauv nws daim teb, muaj qee lub nplej poob rau hauv plawv kev, noog ya los khaws noj lawm. 5Muaj qee lub poob rau ntawm qhov av uas hauv muaj pobzeb tiv lawm, av tsis tob. Cov noob ntawd tuaj sai sai vim av tsis tob. 6Thaum hnub tuaj tshavntuj kub, cov kaus nplej txawm ntsws thiab qhuav lawm vim tus cag tsis tau chaw ntsia av. 7Muaj qee lub poob rau hauv lub hauvpaus pos, pos hlob tuaj laum cov nplej ntawd. 8Tiamsis muaj qee lub poob rau ntawm qhov av zoo, cov ntawd loj hlob txhawv taus. Qee hnab txi tau ibpuas lub, qee hnab txi tau raucaum lub, qee hnab txi tau pebcaug lub.

Mathais 13:14-15

14Tej lus uas Yaxayas tus cev Vajtswv lus twb hais tseg lawm, tiav rau cov neeg ntawd li no hais tias, Tej neeg no yuav mloog tas mloog thiab, tiamsis yuav tsis totaub. Lawv yuav ntsia tas ntsia thiab, tiamsis yuav tsis pom, 15rau qhov lawv lub siab ruam, lawv tsis xav mloog, lawv ntsaws pobntseg, lawv tsis xav ntsia, lawv qi muag. Yog lawv tsis ua li ntawd, ntshai nyob tsam lawv qhovmuag yuav pom, lawv pobntseg yuav hnov, lawv yuav totaub. Cais lawv yuav tig rov los cuag kuv, thiab kuv yuav kho lawv tej mob. (Yaxayas 6:9-10)

Tus Tseb Nplej Txhais (Mathais 13: 19 - 23)

19 Cov neeg uas hnov zaj Vajtswv yuav los kav neeg lub siab, tiamsis tsis totaub. Cov neeg ntawd lub siab piv txog txojkev uas noob nplej poob rau. Tiamsis dab ntxwgnyoog los muab tej lus uas tseb rau hauv lawv lub siab txeeb nqa lawm. 20 Cov noob nplej uas poob rau ntawm qhov av uas hauv muaj pobzeb tiv lawm, piv txog cov neeg uas hnov dheev Vajtswv txojlus, lawv zoo siab hlo yuav tamsim ntawd. 21Tiamsis txojlus ntawd txeem mus rau hauv lawv lub siab tsis tob. Lawv lees yuav ib nyuag ntu xwb, thaum lawv raug kev txomnyem lossis kev tsimtxom vim txojlus ntawd, cais lawv txawm thim hlo rov qab lawm. 22Cov noob nplej uas poob rau hauv lub hauvpaus pos, piv txog cov neeg uas hnov Vajtswv txojlus, tiamsis lawv tej kev nyuajsiab, kev ntshaw nyiaj ntshaw txiaj hlob tuaj laum Vajtswv txojlus lawm, txojlus ntawd thiaj tsis txi txiv. 23Cov noob nplej uas poob rau ntawm qhov av zoo, piv txog cov neeg uas hnov Vajtswv txojlus thiab totaub. Cov neeg ntawd ib txhia txi tau ibpuas lub, ib txhia txi tau raucaum lub, thiab ib txhia txi tau pebcaug lub.

Txhais zaj Nplej thiab Txhauv (Mathais 13: 37 - 43)

Zaj Nplej thiab Txhauv nyob rau: (Mathais 13:24-30) 37Yexus qhia hais tias, Tus uas tseb cov noob nplej zoo ntawd, nws yog Neeg Leejtub. 38Daim teb ntawd yog lub ntiajteb no. Cov noob nplej zoo yog cov neeg uas Vajtswv kav lawm. Cov txhauv yog cov neeg uas dab ntxwgnyoog kav. 39Thiab tus yeebncuab uas tuaj tseb cov noob txhauv ntawd twb yog dab ntxwgnyoog ntag. Lub caij hlais yog lub sijhawm ntiajteb kawg. Cov neeg hlais yog cov tubtxib saum qaumntuj. 40Lub sijhawm ntiajteb kawg yuav zoo ib yam li thaum lawv sau cov txhauv los pov hlawv. 41Neeg Leejtub nws yuav txib nws cov tubtxib saum qaumntuj tawm mus sau cov neeg uas ua rau lwm tus yuamkev ua txhaum, thiab sau cov neeg uas ua phem huv tibsi tawm hauv cov neeg uas Vajtswv kav lawm mus. 42Cov tubtxib saum qaumntuj yuav muab cov neeg ntawd pov rau hauv lub cubtawg uas cig hlob hlob. Lawv yuav quaj qw tom hniav qees hauv. 43Thaum ntawd Vajtswv haivneeg yuav ci ntsa iab ib yam li lub hnub hauv Leejtxiv lub tebchaws. Yog leejtwg muaj pobntseg cia li khaws zaj no cia.

Mathais 13:49-50

49 Thaum lub sijhawm ntiajteb kawg yuav zoo li hais no: Cov tubtxib saum qaumntuj yuav tawm mus muab cov neeg ua phem rho tawm hauv cov neeg zoo, 50 mus pov rau hauv lub cubtawg uas cig hlob hlob, lawv yuav quaj qw tom hniav qees hauv.

Mathais 13:55 (Yexus tsev neeg)

55Nws yog tus kws ntoo tub los sav. Nws niam twb yog Maivliag ne. Thiab nws cov kwv twb yog Yakaunpaus, Yauxej, Ximoos thiab Yudas lawv ne. Yexus naim: Maivliag Yexus cov kwv: 1. Yakaunpaus 2. Yauxej 3. Ximoos 4. Yudas