1 Kaulithaus 5:8

8Peb cia li noj, tiamsis tsis txhob noj cov mov uas muaj poov xyaw, rau qhov cov poov ntawd piv txog tej kev phem, kev qias. Peb yuav tsum noj cov mov uas tsis xyaw poov, rau qhov cov mov ntawd piv txog txojkev ncajncees thiab qhovtseeb.

1 Kaulithaus 5:11

11Tiamsis kuv hais tias, nej tsis txhob mus koom tus uas ua txuj hais tias, nws yog tus ntseeg, tiamsis nws tseem nyiam ua plees ua yi, ntshaw luag tug, pe dab pe mlom, thuam lwm tus, quavdej quavcawv, lossis txhav luag tug. Txawm yog noj mov los, nej tsis txhob nrog nws koom tsum hlo li.

1 Kaulithaus 6:1-3

Yog nej cov ntseeg ib leeg ua plaub rau ib leeg , nej yuav coj mus rau cov neeg tsis ntseeg pab nej hais los? Twb tsimnyog nej cia rau cov ntseeg hais xwb los sav. 2Nej tsis paub hais tias, cov ntseeg yog cov yuav txiav txim rau neeg ntiajteb huv tibsi. Yog li ntawd yog nej yuav txiav txim rau neeg ntiajteb, nej tseem yuav tsis muaj cuabkav hais tej nyuag plaub me me no thiab los? 3Nej tsis paub hais tias, peb twb yog cov yuav txiav txim rau cov tubtxib saum qaumntuj. Yog li ntawd peb yeej yuav hais tau tej nyuag xwm me me uas niajhnub muaj no thiab los pauj.

1 Kaulithaus 6:7-10

7Qhov uas nej ib leeg ua plaub rau ib leeg, qhov ntawd twb ua rau sawvdaws paub tseeb hais tias, nej puavleej ua phem. Ua cas nej tsis cia luag ua tus yeej, nej ua tus swb? Txawm yog luag ntxo nej tug lawm los, puamchawj luag los pauj. 8Tiamsis nej ho tsis ua li ntawd. Txawm yog nej yog tib co ntseeg los, nej ib leeg tseem ua phem rau ib leeg, thiab ib leeg ntxo ib leeg. 9Nej twb paub lawm hais tias, Vajtswv yeej tsis kav cov neeg siab phem. Nej tsis txhob rov dag nej, cov neeg nyiam ua plees ua yi, cov neeg pe dab pe mlom, cov neeg nrog luag poj luag txiv ua pleesyig, txivneej rov nrog txivneej ua kev plees kev yig, 10cov neeg ua tubsab, ntshaw luag tug, quavdej quavcawv, thuam lwm tus, lossis txhav luag tug, cov neeg ntawd yeej tsis muaj ib tug tau los ua Vajtswv haivneeg hlo li.

1 Kaulithaus 6:13-20

Vajtswv tsis tsim neeg lub cev ua plees ua yi, tiamsis nws tsim los teevtiam nws, nws yog tus Tswv kav lub cev. 14Vajtswv twb tsa Yexus sawv hauv qhovtuag rov qab los lawm. Vajtswv lub hwjchim yeej yuav tsa peb sawv ib yam nkaus. 15Nej puavleej paub hais tias, nej lub cev yog Yexus Khetos tej tes taw. Kuv yeej muab tsis tau Yexus Khetos tej tes taw coj mus ua niamntiav tej tes taw. 16Nej tsis paub los, tus uas mus nrog niamntiav ua pleesyig, tus ntawd nrog niamntiav koom ib lub cev. Vajtswv phau ntawv qhia tseeb hais tias, nkawd yuav ciaj ua ib lub cev (Chivkeeb 2:24). 17Tus uas nrog tus Tswv koom ib txogsia, tus ntawd nrog nws koom ib lub siab. 18Nej tsis txhob ua plees ua yi. Tej kev txhaum uas neeg niajhnub ua yeej tsis ua rau neeg lub cev qias. Tiamsis tus uas ua plees ua yi, tus ntawd nws ua rau nws lub cev qias. 19Nej tsis paub los? Nej lub cev yog Vajtswv tus Ntsujplig lub tsev. Tus Ntsujplig uas Vajtswv pub rau nej ntawd nyob hauv nej lub siab. Nej tsis yog tus tswv uas kav nej lub cev, Vajtswv yog tus uas kav. 20Vajtswv twb txhiv nej kim kim kawg li, yog li ntawd nej yuav tsum tswj nej lub cev Vajtswv thiaj li tau ntsejmuag.

1 Kaulithaus 7:3-5

3Tus txiv thiab tus pojniam ib leeg tsis txhob cais ib leeg chaw pw, ob leeg yuav tsum nyob ua txij ua nkawm. 4Tus pojniam, nws tsis muaj cai kav nws lub cev, tus txiv yog tus muaj cai kav. Ib yam nkaus li ntawd tus txiv, nws tsis muaj cai kav nws lub cev, tus pojniam yog tus muaj cai kav tus txiv lub cev. 5 Neb yog ob niamtxiv, neb tsis txhob sib cais chaw pw. Yog neb yuav cais, neb yuav tsum hais kom sib haum tso mam li cais hmo puav neb thiaj li muaj sijhawm thov Vajtswv. Tomqab ntawd neb yuav tsum rov qab los pw ua ke dua, nyob tsam neb cais tsis taus, ntxwgnyoog yuav ntxias tau nej yuamkev.

1 Kaulithaus 7:10-11

10 Kuv qhia ib los rau nej cov uas twb yuav pojniam yuav txiv lawm hais tias, tus pojniam nws tsis txhob tso nws tus txiv tseg . Lo lus ntawd yeej yog tus Tswv Yexus lus tsis yog kuv lus. 11 Yog nws muab nws tus txiv tso tseg lawm nws tsis txhob mus yuav txiv. Yog nws xav yuav txiv, nws cia li rov los nrog nws tus txiv qub sib raug zoo xwb. Tus txiv, nws tsis txhob muab nws tus pojniam nrauj .

1 Kaulithaus 7:12-16

12Kuv yuav qhia dua ib los ntxiv, tiamsis lo lus uas kuv yuav hais no yog kuv lus tsis yog tus Tswv Yexus lus. Nej cov ntseeg Yexus yog leejtwg tus pojniam tsis ntseeg , tiamsis nws zoo siab nrog nws tus txiv nyob, tus txiv tsis txhob muab nws nrauj. 13 Tus pojniam ntseeg , yog nws tus txiv tsis ntseeg tiamsis tus txiv zoo siab nrog nws nyob, nws tsis txhob muab nws tus txiv nrauj. 14Yog tus niam ntseeg lawm, tus txiv yeej yog Vajtswv tug thiab. Yog tus txiv ntseeg lawm, tus niam yog Vajtswv tug ib yam nkaus. Yog tsis yog li ntawd, nkawd cov menyuam yuav zoo ib yam li cov tsis ntseeg tej menyuam, tiamsis tsis yog li ntawd, nkawd cov menyuam yeej yog Vajtswv menyuam. 15Txawm yog li cas los puamchawj, yog tus tsis ntseeg xav muab tus ntseeg tso tseg cia li tso los tau. Yog muaj li no lawm, cov ntseeg tsis hais tus pojniam lossis tus txiv, nyob ntawm nws siab xav saib nws yuav tso los tsis tso. Rau qhov Vajtswv xav kom nej nyob sib haum. 16 Nej cov ntseeg uas yog pojniam , nej yeej tsis paub hais tias, xyov nej puas yuav coj tau nej tej txiv los ntseeg los tsis tau. Nej cov ntseeg uas yog txiv , nej yeej tsis paub hais tias, xyov nej puas yuav coj tau nej tus pojniam los ntseeg los tsis tau.

1 Kaulithaus 7:18-19

18 Tus uas twb xub ua kevcai txiav lawm , Vajtswv mam li hu nws los ntseeg, nws tsis txhob rhuav qhov uas nws ua kevcai txiav. Tus uas yeej ib txwm tsis ua kevcai txiav, thaum nws los ntseeg nws tsis txhob ua kevcai txiav. 19Qhov uas neeg ua kevcai txiav lossis tsis ua qhov ntawd tsis tseemceeb. Qhov tseemceeb yog qhov yus mloog Vajtswv lus.

1 Kaulithaus 7:23-24

23 Vajtswv twb txhiv nej kim kim kawg li , nej tsis txhob pub leejtwg ntxias tau nej mus ua qhev. 24 Cov kwvtij es, thaum Vajtswv hu nej los ntseeg nej yeej nrog Vajtswv sib raug zoo. Nimno nej yuav tsum nrog Vajtswv sib raug zoo ib yam nkaus li ntawd.

1 Kaulithaus 7:39-40

39Tus pojniam uas muaj txiv lawm, yog nws tus txiv tseem ua neej nyob nws yeej tsis muaj cai mus yuav dua txiv tshiab. Tiamsis yog nws tus txiv tuag lawm nws muaj cai mus yuav txiv tshiab, tiamsis yuav tsum yuav tus ntseeg Yexus. 40Txawm yog li cas los puamchawj, yog nws nyob tabseeb khuav nws yuav tau zoo heev dua. Kuv xav hais tias, tej lus uas kuv hais no puavleej yog tej lus uas Vajtswv tus Ntsujplig qhia rau kuv.

1 Kaulithaus 8:4-13 (Tej zaub mov uas luag muab fij rau mlom)

4Kuv yuav hais txog tej zaubmov uas luag muab fij rau mlom. Peb puavleej paub hais tias, niag mlom yeej tsis muaj sia. Peb paub hais tias, tsuas muaj tib tug Vajtswv xwb. 5Txawm yog muaj neeg hu tej timtswv saum nruabntug lossis hauv ntiajteb no hais tias, Vajtswv, thiab txawm yog muaj ntau tus uas sawvdaws hu hais tias, Timtswv lossis hu hais tias, Tus tswv los, 6peb paub hais tias, tsuas muaj tib tug Vajtswv xwb. Tus ntawd yog peb Leejtxiv uas tsim ib puas tsav yam, thiab coj peb los ua neej rau nws tau ntsejmuag. Yeej muaj tib tug Tswv xwb, tus ntawd yog Yexus Khetos tus uas Vajtswv tsa ua tus tsim ib puas tsav yam, thiab tus uas tuav peb txojsia. 7Tiamsis tsis yog txhua tus paub tej lus tseeb ntawd. Muaj qee leej neeg ib txwm teev mlom los lawm. Thaum lawv noj tej zaubmov lawv tseem pheej xav hais tias, tej ntawd yog tej uas luag muab fij rau mlom lawm. Lawv paub tej ntawd tsis tseeb lawv thiaj xav hais tias, yog lawv noj nyob tsam lawv ua txhaum. 8Tej zaubmov yeej pab tsis tau kom peb muab siab rau ntseeg Vajtswv ntxiv. Txawm yog peb noj lossis tsis noj los, yeej tsis ua rau peb muab siab rau ntseeg ntxiv. 9Txawm yog li cas los puamchawj, nej yuav tsum ceevfaj nyob tsam nej cov uas muaj cuabkav noj yam ub yam no ua rau cov uas muaj kev ntseeg tsawg xav yuamkev. 10Yog tus uas ntaus siabyau pom nej cov uas paub tseeb zaum noj mov hauv tsev teev mlom, nws yuav cia li mus noj tej zaubmov uas luag twb muab fij rau mlom lawm thiab los paub. 11Twb yog vim nej hais tias, nej yog cov paub nej thiaj ua rau tus uas ntaus siab yau raug vibnpog. Yexus Khetos twb theej tus ntawd lub txhoj lawm thiab. 12Thaum nej ua txhaum qhov uas tus ntseeg ntaus siab yau, cais twb yog nej ua txhaum Yexus Khetos ntag. 13Yog tej zaubmov uas kuv noj ua rau ib tug ntseeg twg xav yuamkev, cais txij no mus kuv yuav tsis noj nqaij ib zaug li lawm, kuv thiaj yuav tsis ua rau tus ntseeg ua txhaum.

1 Kaulithaus 9:20-22

20 Thaum kuv nrog cov neeg Yudais nyob ua ke kuv ua ib yam li lawv , rau qhov kuv xav coj lawv los ntseeg. Txawm yog Mauxes txoj kevcai tsis muaj cai yuam kuv lawm los, thaum kuv nrog cov neeg uas xyaum coj Mauxes txoj kevcai nyob ua ke kuv ua ib yam li lawv, rau qhov kuv xav coj lawv los ntseeg. 21 Thaum kuv nrog lwm haivneeg nyob ua ke kuv ua ib yam li tus uas tsis coj Yudais kevcai , rau qhov kuv xav coj lwm haivneeg los ntseeg. Kuv hais li no tsis yog kuv hais tias, kuv tsis coj Vajtswv txoj kevcai, tiamsis Yexus Khetos txoj kevcai tswjhwm kuv. 22 Thaum kuv nrog cov neeg muaj kev ntseeg tsawg nyob ua ke, kuv ua ib yam li lawv rau qhov kuv xav pab kom lawv muaj kev ntseeg ntau. Kuv niajhnub xyaum ua ib yam li txhua haivneeg ua. Kuv ua li ntawd saib puas yuav pab tau qee leej dim tej kev txhaum.

1 Kaulithaus 9:23-27

23Kuv ua ib puas tsav yam li no twb yog kuv xav kom Txojmoo zoo nrov ncha mus thoob plaws qhovtxhia qhovchaw, kuv thiaj muaj feem tau koobhmoov thiab. 24Nyaj nej yuav paub hais tias, cov neeg sibtw khiav puavleej ib txhij khiav, tiamsis tsuas muaj ib tug khiav yeej xwb. Tus uas khiav yeej thiaj tau nqizog. Yog li ntawd nej yuav tsum sibzog khiav tiag tiag kom yeej nej thiaj tau nqizog. 25Tus uas sibtw khiav tus ntawd yeej niajhnub xyaum khiav kom nws txais tej nqis zog uas yog tej momkub uas txawj puas tsuaj.. Tiamsis peb sibtw khiav kom peb tau lub momkub uas yuav nyob mus ib txhis. 26Yog li ntawd kuv thiaj li khiav ncaj nraim mus rau tus ciam tom kawg. Thiab kuv ua li tus uas txawj sib ntaus. Kuv ua tib zoo ntaus, kuv tsis lam tau lam ntaus huab, ntaus cua. 27Kuv niajhnub tswj rawv kuv lub cev rau qhov kuv yeej yog tus uas qhia lwm tus. Yog kuv tsis tswj kuv lub cev nyob tsam kuv tsis tau nrog luag sib tw khiav.

1 Kaulithaus 10:12-13

12 Yog li ntawd tus uas xav hais tias, nws twb sawv khov kho lawm tus ntawd yuav tsum ceevfaj nyob tsam nws ntog. 13 Tej kev uas sim nej siab tsuas yog tej uas sawvdaws yeej ib txwm muaj los lawm xwb. Vajtswv yog tus ncajncees, nws yuav tsis pub nej raug tej kev sim siab uas nej nyiaj tsis taus. Thaum nej raug tej kev sim siab, Vajtswv yuav pab nej ua taus siab ntev nej thiaj yuav nyiaj taus dhau.

1 Kaulithaus 10:21-22

21Yog nej haus Yexus Khetos lub khob thiab dab lub khob yeej tsis tau. Yog nej noj Yexus Khetos roojmov thiab dab roojmov yeej tsis tau ib yam nkaus. 22Peb yuav ua kom Yexus Khetos khib peb los? Nej xav hais tias, peb muaj hwjchim loj dua nws los?

Chivkeeb 2:24

24Twb yog vim li ntawd tus txivneej thiaj tso nws niam nws txiv tseg mus nrog nws tus pojniam nyob ua txij ua nkawm, nkawd thiaj koom ua ib tug.