1 Kaulithaus 10:24

24 Nej tsis txhob ua li tus uas nws tsuas xam pom nws xwb, nws tsis xam pom luag lwm tus.

1 Kaulithaus 10:25-26

25Tej nqaij uas luag muag tom kiab tom khw nej puavleej noj tau huv tibsi. Yog xis nej siab nej cia li noj tsis txhob nug li cas li. 26Rau qhov twb muaj lus sau cia rau hauv Vajtswv phau ntawv lawm hais tias, lub ntiajteb thiab ib puas tsav yam uas nyob hauv ntiajteb puavleej yog tus Tswv uas yog Vajtswv li tagnrho (Nkauj qhuas Vajtswv 24:1)

1 Kaulithaus 10:27-29

27 Yog cov neeg uas tsis ntseeg Yexus hu nej mus nrog lawv noj mov, thaum nej mus yog nej tsis xav li cas, nej cia li noj tej zaubmov uas lawv ua tos nej, nej tsis txhob nug li cas li. 28 Tiamsis yog muaj neeg hais rau nej hais tias , tej zaubmov ntawd lawv twb muab fij rau dab lawm , yog li ntawd nej tsis txhob noj, nyob tsam nej ua rau tus uas qhia nej ntawd yuamkev. 29Kuv hais li ntawd tsis yog vim kuv ntshai nyob tsam nej xav yuamkev, tiamsis kuv ntshai nyob tsam nej ua rau tus uas qhia nej ntawd xav yuamkev.

1 Kaulithaus 10:33

33 Nej cia li ua nej lub neej ib yam li kuv ua kuv lub . Kuv niajhnub xyaum ua kom haum sawvdaws siab. Kuv tsis ua tej no kom muaj nujnqis rau kuv, tiamsis kuv ua kom muaj nujnqis rau sawvdaws, lawv thiaj yuav dim lawv lub txim

1 Kaulithaus 11:3

3Tiamsis kuv xav kom nej totaub hais tias, Yexus Khetos yog txhua tus txivneej lub taubhau. Tus txiv yog tus niam lub taubhau. Vajtswv yog Yexus Khetos lub taubhau.

1 Kaulithaus 11:7-9

7 Tsis tas txivneej ntoo phuam rau qhov txivneej muaj Vajtswv tus hwvxyeej, tiamsis pojniam nws muaj nws tus txiv tus hwvxyeej. 8 Rau qhov Vajtswv muab txivneej ib tug tav lov coj los puab ua pojniam, tsis yog lov pojniam tus tav los puab ua txivneej. 9 Tsis yog Vajtswv tsim txivneej rau pojniam, tiamsis Vajtswv tsim pojniam rau txivneej.

1 Kaulithaus 11:23-26

23Tej lus uas kuv twb xub qhia rau nej lawm, yeej yog tus Tswv kom kuv hais. Kuv hais tias, Hmo uas luag ntxeev siab rau Tswv Yexus, hmo ntawd Yexus muab ib thooj mov los. 24Thaum nws ua Vajtswv tsaug tas nws muab ntais, nws hais tias, Thooj mov no yog kuv lub cev uas kuv muab pab nej. Nej yuav tsum ua li kuv ua no nej thiaj yuav nco ntsoov kuv. 25Thaum noj hmo tas nws muab ib lub khob los ua ib yam nkaus li ntawd. Nws hais tias, lub khob no yog Vajtswv tej lus cog tseg tshiab uas muaj kuv cov ntshav ua lub cim nias rau. Thaum nej haus lub khob no nej yuav tsum nco ntsoov kuv. 26 Txhua zaus uas nej noj thooj mov ntawd thiab haus lub khob ntawd, twb yog nej qhia Yexus txojkev tuag mus txog hnub Yexus rov qab los.

1 Kaulithaus 12:2

2Nej puavleej paub hais tias, thaum nej tseem coj txoj qub kevcai muaj ntau yam ntxeev ntxias nej pe dab pe mlom.

1 Kaulithaus 12:7-11 (tej tswvyim uas Vajtswv tus Ntsujplig pub)

7 Vajtswv tus Ntsujplig pub txhua tus nyias muaj nyias tswvyim thiaj yuav pab tau cov ntseeg huv tibsi. 8Vajtswv tus Ntsujplig pub ib tug: 1 . muaj tswvyim hais tej lus thoobtsib tonrog , 2 . muaj tswvyim txawj qhia 3 . muaj kev ntseeg , 4 . muaj hwjchim kho tau tej neeg mob . 5 . muaj hwjchim ua tau tej txujci tseemceeb , 6 . ib tug cev Vajtswv lus , 7 . ib tug paub saib tej tswvyim uas yog Vajtswv tus Ntsujplig li thiab tej uas tsis yog . 8 . Ib tug txawj hais lus txawv txawv , 9 . ib tug txawj txhais tej lus txawv txawv ntawd. 11Tiamsis ib puas tsav yam no puavleej yog Vajtswv tib tug Ntsujplig pub. Nws pub txhua tus nyias muaj nyias tswvyim raws li nws pom zoo pub.

1 Kaulithaus 12:26

26Yog lub cev muaj ib qho mob lawm yeej yuav mob thoob plaws lub cev. Yog luag qhuas lub cev ib qho, tagnrho lub cev puavleej yuav tau ntsejmuag.

1 Kaulithaus 13:1-7

Txawm yog kuv hais tau ib puas tsav yam lus uas txhua haivneeg hais, lossis hais tau cov tubtxib saum qaumntuj lus los, yog kuv tsis muaj lub siab hlub, tej lus uas kuv hais tau ntawd zoo li tej suab tswb nyuj tswb nees nrov nrov xwb. 2Txawm yog Vajtswv tsa kuv ua tus cev nws lus, kuv totaub ib puas tsav yam uas tsis muaj neeg paub, kuv txawjntse heev, thiab muaj kev ntseeg hais tau kom tojroob hauvpes txav mus nyob lwm qhov los, yog kuv tsis muaj lub siab hlub, tej uas kuv txawj yeej tsis muaj nujnqi dabtsi hlo li. 3Txawm yog kuv muab txhua yam uas yog kuv tug pub rau lwm tus, thiab muab kuv lub cev rau luag coj mus hlawv los, yog kuv tsis muaj lub siab hlub, tej uas kuv ua ntawd yeej tsis muaj nujnqis rau kuv hlo li. 4Tus uas muaj lub siab hlub nws ua taus siab ntev, nws pab luag, nws tsis ntxub leejtwg, nws tsis muabhlob, nws tsis khavtxiv, 5nws paub cai, siab dawb, siab zoo, tsis muaj lub siab hlob, tsis chim sai, tsis cim ntsoov luag tej kev txhaum, 6tsis nyiam qhov phem, qhov qias tiamsis nyiam qhov ncajncees. 7Tus uas muaj lub siab hlub, nws nyiaj taus ib puas tsav yam, muab siab rau ntseeg, muaj chaw cia siab thiab ua siab ntev mus li.

1 Kaulithaus 13:13

13Nimno tseem muaj peb yam uas yuav nyob mus ib txhis, peb yam ntawd yog kev ntseeg, kev cia siab thiab kev hlub. Tiamsis kev hlub yog yam tseemceeb dua ntais huv tibsi.

1 Kaulithaus 14:1-4

Yog li ntawd nej yuav tsum niajhnubmuaj lub siab hlub, muab siab raunrhiav Vajtswv tus Ntsujplig tej tswvyim xws li:- lub tswvyim cev Vajtswv tej lus . 2 Nej yuav tsum thov Vajtswv pub lub tswvyim ntawd rau nej. Tus uas txawj hais lus txawv txawv, tsis yog nws hais rau neeg tiamsis nws hais rau Vajtswv, rau qhov tsis muaj neeg totaub tej lus nws hais. Tej lus nws hais ntawd twb yog Vajtswv tus Ntsujplig kom nws hais, tiamsis tsis muaj neeg paub xwb. 3 Tus uas qhia Vajtswv zaj tus ntawd nws hais rau neeg. Tej lus uas nws hais ntawd yuav pab tau sawvdaws muab siab rau ntseeg, txhawb sawvdaws lub zog thiab ntuas sawvdaws. 4 Tus uas hais lus txawv txawv nws tsuas pab tau nws xwb, tiamsis tus uas cev Vajtswv lus, tus ntawd pab tau txhua tus ntseeg huv tibsi.

1 Kaulithaus 14:20

20Cov kwvtij es, nej tsis txhob niajhnub xav li tej menyuam yaus xav, nej yuav tsum xav li cov neeg laus xav, thiab ua li tej menyuam mos uas yeej tsis paub ua phem ua.

1 Kaulithaus 14:22

22 Yog li ntawd lub tswvyim hais lus txawv txawv tsuas ua rau cov tsis ntseeg pom Vajtswv lub hwjchim, tsis yog ua rau cov ntseeg pom. Tiamsis lub tswvyim cev Vajtswv tej lus ua rau cov ntseeg pom Vajtswv lub hwjchim, tsis yog ua rau cov tsis ntseeg pom.

1 Kaulithaus 14:23-25

23Yog li ntawd thaum nej cov ntseeg tuaj txoos ua ke, yog txhua tus nyias hais nyias lus txawv txawv , cov neeg uas tsis totaub tej lus ntawd, thiab cov neeg uas tsis ntseeg lawv pom nej hais li ntawd lawv yuav cia li hais tias, nej vwm lawm. 24Tiamsis yog sawvdaws cev Vajtswv lus, thaum tus tsis ntseeg lossis tus uas yeej ib txwm tsis paub Vajtswv zaj tuaj mloog, tej lus ntawd yuav ua rau nws paub nws kev txhaum thiab ua rau nws paub hais tias, nws yuav raug txim. 25Vajtswv yuav muab tej uas tus ntawd xav, nthuav rau sawvdaws saib. Thaum Vajtswv ua li ntawd nws yuav txhos caug ntua pe Vajtswv hais tias, Vajtswv nrog nraim nej nyob ntawm no lawm tiag lauj.