1 Kaulithaus 1:3

3Thov tus Vajtswv uas yog peb Leejtxiv thiab tus Tswv Yexus Khetos hlub nej thiab pab kom nej tau zoo nyob kajsiab lug.

1 Kaulithaus 1:9

9 Tus Vajtswv uas hu nej los nrog nws tus Tub Yexus Khetos uas yog peb tus Tswv sib raug zoo, nws yog tus Vajtswv uas nej cia siab tau.

1 Kaulithaus 1:18-19

18 Cov neeg uas yeej yuav raug kev puastsuaj lawv xav hais tias, zaj uas Yexus Khetos tuag saum tus ntoo khaublig, zaj ntawd tsis tseemceeb dabtsi li. Tiamsis peb cov uas tabtom yuav dim peb paub hais tias, zaj ntawd yog Vajtswv lub hwjchim. 19 Raws li twb muaj lus sau cia rau hauv Vajtswv phau ntawv lawm hais tias, Kuv yuav rhuav cov neeg txawjntse lub tswvyim. Kuv yuav ua rau cov neeg kawm txawj kawm ntse tej tswvyim tsis muaj nujnqis. (Yaxayas 29:14)

1 Kaulithaus 1:21

21Tus Vajtswv uas muaj tswvyim, nws ua rau neeg lub tswvyim qhia tsis tau rau neeg paub nws. Tiamsis Vajtswv pom zoo cawm cov neeg ntseeg tej zaj uas neeg suav hais tias, tsis tseemceeb uas peb qhia.

1 Kaulithaus 1:24-25

24Tiamsis cov neeg uas Vajtswv twb xaiv cia lawm, tsis hais cov neeg Yudais lossis lwm haivneeg , sawvdaws paub tseeb hais tias, Yexus Khetos yog Vajtswv lub hwjchim thiab Vajtswv lub tswvyim. 25Rau qhov Vajtswv lub tswvyim uas neeg xav hais tias, ruam, tseem ntse dua cov neeg txawjntse tej tswvyim. Thiab Vajtswv lub zog uas neeg xav hais tias, tsis muaj zog, tseem muaj zog heev dua neeg lub zog thiab.

1 Kaulithaus 1:27-29

27Tiamsis Vajtswv pom zoo xaiv tej uas neeg suav hais tias, tsis tseemceeb kom cov neeg uas muaj tswvyim txajmuag. Thiab Vajtswv xaiv tej uas neeg suav hais tias, tsis muaj hwjchim kom cov neeg uas muaj hwjchim poob ntsejmuag. 28Vajtswv xaiv tej uas neeg thuam, neeg saib tsis taus thiab suav hais tias, tsis tseemceeb kom tej uas neeg suav hais tias, tseemceeb puastsuaj mus. 29Vim Vajtswv ua li ntawd yuav tsis muaj ib tug muaj cuabkav khav rau Vajtswv hais tias, nws yog tus uas muaj hwjchim.

1 Kaulithaus 2:4-5

4Tej lus uas kuv hais thiab tej lus uas kuv qhia ntawd, tsis yog cov neeg uas muaj tswvyim tej lus, tiamsis yog tej lus uas ua rau sawvdaws pom Vajtswv tus Ntsujplig lub hwjchim. 5Yog li ntawd qhov uas nej ntseeg Yexus tsis yog nej cia siab rau neeg tej tswvyim, tiamsis yog nej cia siab rau Vajtswv lub hwjchim .

1 Kaulithaus 2:12

12Vajtswv tsis tau kom peb cia siab rau neeg lub tswvyim, tiamsis nws kom peb cia siab rau nws tus Ntsujplig uas nws txib los nyob hauv peb lub siab, peb thiaj li yuav paub ib puas tsav yam uas nws pub rau peb.

1 Kaulithaus 2:14

14Tiamsis tus uas tsis muaj Vajtswv tus Ntsujplig , tus ntawd yeej tsis tau tej uas Vajtswv tus Ntsujplig pub. Nws tsis totaub, nws xav hais tias, tej ntawd tsis muaj hauvpaus hauvntsis. Tsuas yog tus uas muaj Vajtswv tus Ntsujplig xwb thiaj li pom hais tias, tej no yog tej uas tseemceeb.

1 Kaulithaus 3:3

3rau qhov nej tseem coj nej lub neej ib yam li neeg ntiajteb lub. Nej ib leeg ntxub ib leeg thiab ib leeg nrog ib leeg sib cav sib ceg. Nej coj li ntawd twb yog nej tseem coj nej tus cujpwm ib yam li neeg ntiajteb tus los sav.

1 Kaulithaus 3:13

13 Thaum txog hnub Yexus Khetos rov qab los , peb yuav pom tej haujlwm uas sawvdaws tau ua los lawm saib zoo li cas. Rau qhov hnub ntawd yuav muaj hluavtaws sim txhua tus tej haujlwm saib puas ruaj puas khov.

1 Kaulithaus 3:16-17

16Nyaj nej yuav paub hais tias, nej lub cev yog Vajtswv lub tsev thiab paub hais tias, Vajtswv tus Ntsujplig nyob hauv nej lub siab. 17Yog leejtwg rhuav Vajtswv lub tsev, Vajtswv yuav ua rau tus ntawd puastsuaj mus, rau qhov Vajtswv lub tsev yog lub zoo kawg nkaus. Nej yog Vajtswv lub tsev ntag.

1 Kaulithaus 3:18-19

18 Yus tsis txhob rov dag yus . Yog leejtwg xav hais tias, nws yog tus txawjntse raws li neeg ntiajteb ntsuas tseg, tus uas xav li ntawd nws yuav tsum ua li tus ruam, nws thiaj yuav yog tus ntse tiag. 19Rau qhov tej uas neeg suav hais tias, yog kev txawjntse, Vajtswv suav hais tias, tej ntawd yog tej uas ruam. Raws li twb muaj lus sau cia rau hauv Vajtswv phau ntawv lawm hais tias, Vajtswv muab tus txawjntse lub tswvyim rov qab los cuab tus ntawd kev (Yauj 5:13) .

1 Kaulithaus 3:23

23 Nej yog Yexus Khetos tug, Yexus Khetos yog Vajtswv tug.

1 Kaulithaus 4:3-5

3Txawm yog nej lossis lwm tus txiavtxim li cas rau kuv los, tej ntawd tsis ua rau kuv nyuajsiab . Txawm yog kuv los, kuv yeej tsis tau ntsuas kuv hais tias, kuv ua zoo lossis ua phem. 4Kuv lub siab qhia rau kuv hais tias, kuv tsis tau ua txhaum. Kuv hais li ntawd tsis yog kuv hais tias, kuv tsis muaj ib qho txhaum hlo li. Tus Tswv tib leeg xwb thiaj yog tus txiav txim rau kuv. 5Yog li ntawd thaum tseem tsis tau txog lub sijhawm Vajtswv teem cia nej tsis txhob rawm hais tias, tus no ua zoo, tus tod ua phem . Tos txog hnub tus Tswv rov qab los tso nws mam li txiav txim. Nws yuav muab tej uas neeg ua hauv qhovtsaus nthuav rau qhov pomkev. Thiab nws yuav muab tej uas neeg lub siab xav hauv nruabsiab nthuav rau sawvdaws saib. Thaum ntawd Vajtswv yuav qhuas txhua tus uas yeej tsimnyog Vajtswv qhuas.

1 Kaulithaus 4:7

7 Leejtwg tsa nej lub neej zoo dua lwm tus lub. Ib puas tsav yam uas nej muaj puavleej yog Vajtswv pub rau nej los sav. Ua cas nej tseem yuav khav hais tias, yog nej khwv tau nej.

Yaxayas 29:14

14Yog li ntawd, kuv yuav ua tejxwmtxheej los aiv lawv, ib vuag dhau ib vuagkom lawv ras. Tej neeg muaj tswvyim yuav ciaj ua neeg ruam, lawv lub tswv yim ntse yuav tsis muaj nujnqis

Yauj 5:13

12-13Nws rhuav cov neeg dagntxias tej tswvyim, nws muab cov neeg txawjntse tej tswvyim phem rov los cuab lawv kev, kom lawv ua tsis tau lawv tej haujlwm tiav.