Hmong World Christian Resource Center

Zoo siab txais tos sawvdaws Dr. Nyiajntxawg Vaj thiab Xibhwb Toojzoo Vaj zoo siab tau ntsib nej txhua tus tuaj ncig xyuas chav no. Wb rhawv chav no los ua peb tus Tswv Yexus tug. Ua qhov chaw rau peb ib tsoom Hmoob ntseeg Vajtswv nyob thoob qab ntuj tau tuaj sib ntsib thiab tso tswvyim uake txog kev koom tes nroos tshaj Txojmoo Zoo mus thoob qab ntuj (Mathais 28:19- 20). Tus uas Vajtswv pub tswvyim rau nws rhawv tau cuab yeej. Yog nws ntseeg tias tej nws ua tau ntawd yog Vajtswv tug, nws coj tuaj tso rau hauv no. Tus uas ho xav tau tswvyim los ntawm lwm tus, nws ho tau tuaj nrhiav coj mus siv ua Vajtswv haujlwm. Nimno yog tiam 21 lawm, tiam uas nyob rau lub ntuj kev vammeej. Tiam no, txoj kev kawm , kev sib txhawb zog thiab sib qhia tsis tas yuav mus nyob kiag hauv lub tsev kawm ntawv thiaj kawm tau los yog mus txog kiag hauv lub tsev pehawm Vajtswv thiaj hnov tau Vajtswv txojlus. Tiamsis tiam vammej no, Vajtswv pub kom txawm yuav nyob rau qhov twg los sawvdaws muaj peevxwm kawm, hnov thiab sib pab qhia tau huv tibsis.

HOMPHIAJ : Lub homphiaj ntawm “ Hmoob Baptist Christian Resource Center ” yog ua lub qhov rooj rau: 1 . Txhua tus uas xav qhia Vajtswv txojlus kom tau qhia. 2 . Txhua tus xav pab txhawb nqa Vajtswv haujlwm kom tau pab. 3 . Txhua tus xav kawm Vajtswv Txojlus kom tau kawm. 4 . Txhua tus xav hnov Vajtswv txojlus kom tau hnov. NCONTSOOV: 1. Tej yam uas cov ntseeg coj tuaj tso tau rau hauv no yog (1) Tej cuabyeej uas cov ntseeg sau ua lus Hmoob hais txog kev ntseeg. (2) Tej lus pov thawj uas muab zom cia ua suab (audio) thiab yees ua Yeebyaj duab (video) lawm. (3) Tej suab nkauj uas hu qhuas Vajtswv. (4) Tej lus qhuab qhia ntawm ibtsoom xibhwb. (5) Tej kev khwv noj haus uas Vajtswv tau pub koobhmoov rau cov ntseeg ua. (6) Tej kev kawm txujci ntau yam los ntawm Vajtswv tes khoob hmoov. (7) Thiab ntau yam uas suav tsis txheeb uas yog cuab yeej qhuas Vajtswv. 2. Thaum peb coj ib yam tuaj tso rau hauv no. (1) peb zoo siab hlo qhia meej tias peb yog leejtwg, peb tus E-mail thiab xovtooj yog li cas. Peb ua li no kom lwm tus uas xav ntsib peb hu tau nrog peb tham.(2) Txhua yam peb coj tuaj tso rau hauv lub Website no, yog peb zoo siab cia lwm tus ntseeg coj mus siv ua cuab yeej tshaj Vajtswv Txojmoo Zoo.(3) Peb txhua tus uas rho tej cuab yeej hauv no mus siv, peb yuav tsis coj mus ua kev tsam peev rau peb tus kheej, tiamsis tshuas yog siv tshaj Txojmoo Zoo xwb.