Malakaus 9:23

Yog leejtwg ntseeg, kuv yeej ua tau txhua yam huv tibsi

Malakaus (:28-29)

Ua cas peb ntiab tsis tau niag dab ntawd tawm? 29 Yexus teb lawv hais tias, Yus yuav tsum thov Vajtswv ntiab xwb, dab thiaj tawm .

Malakaus 9:43

43Yog koj ib txhais tes ua rau koj yuamkev ua txhaum, koj cia li muab txhais ntawd txiav povtseg. Koj tu ib sabtes koj tau mus saum Ceebtsheej, zoo dua li koj muaj ob sab tes ais koj poob rau hauv ntujtawg uas muaj hluavtaws cig tsis paub tuag mus ib txhis.

Malakaus 9:45

45 Thiab yog koj ib txhais kotaw ua rau koj yuamkev ua txhaum, koj cia li muab txhais kotaw ntawd txiav povtseg. Koj tu ib txhais kotaw koj tau mus saum Ceebtsheej, zoo dua li koj muaj ob txhais kotaw ais koj poob rau hauv ntujtawg.

Malakaus 9:47

47 Thiab yog koj ib sab qhovmuag ua rau koj yuamkev ua txhaum, koj cia li muab sab ntawd kaus kiag povtseg. Koj puas ib sab qhovmuag koj tau mus nyob hauv Vajtswv lub tebchaws, zoo dua li koj muaj ob sab qhovmuag ais koj poob rau hauv ntujtawg.

Malakaus 9:49-50

49Vajtswv yuav muab hluavtaws los nchuav txhua leej ib yam li neeg muab ntsev los las nqaij. 50Ntsev yog yam zoo, tiamsis yog ntsev tsuag lawm tsis muaj leejtwg yuav ua tau kom ntsev rov qab qab. Nej yuav tsum ua nej lub neej zoo li tej ntsev uas luag muab las nqaij, thiab nej yuav tsum nyob sib haumxeeb.

Malakaus 10:6-9, 11-12

6Tiamsis thaum chivkeeb Vajtswv tsim ntuj tsim teb, Vajtswv tsim txivneej thiab pojniam. 7Twb yog vim li ntawd tus txivneej thiaj tso nws niam nws txiv tseg, mus nrog nws tus pojniam nyob ua txij ua nkawm. 8Nkawv ob leeg yuav koom ua ib lub cev. nkawd tsis yog ob leeg lawm, tiamsis yog ib leeg xwb. 9Vajtswv twb muab nkawd los ua niamtxiv lawm, yog li ntawd neeg tsis txhob muab nkawd cais. 11Yexus hais rau lawv hais tias, Yog leejtwg muab nws tus pojniam nrauj lawm, nws mus yuav dua pojniam tshiab, twb yog nws mus nrog luag poj luag sev ua kev pleesyig. 12Ib yam nkaus li ntawd, yog ib tug pojniam twg nws muab nws tus txiv nrauj lawm, nws mus yuav dua txiv tshiab, twb yog nws mus nrog luag txiv ua kev pleesyig

Malakaus 10:14-15

14Thaum Yexus pom cov thwjtim ua li ntawd Yexus tsis zoo siab. Yexus hais rau cov thwjtim hais tias, Nej tsis txhob txwv, cia cov menyuam yaus los cuag kuv, rau qhov tus uas xav kom Vajtswv kav nws lub siab, tus ntawd yuav tsum muaj lub siab mos muag li cov menyuam yaus no. 15Kuv qhia tseeb rau nej hais tias, yog leejtwg tsis muaj lub siab mos siab muag ib yam li cov menyuam yaus no, Vajtswv tsis kav tus ntawd lub siab.

Malakaus 10:29-30

29 Yexus hais rau lawv hais tias, Yog tiag tiamsis kuv qhia tseeb rau nej hais tias, tus uas tso vaj tso tsev, tso kwv tso tij, tso nkauj tso muam, tso niam tso txiv, tso metub menyuam, thiab tso liaj tso teb tseg, vim nws yog kuv tus thwjtim thiab nws mus qhia Txojmoo zoo, 30 tiam no tus ntawd yuav tau ib puas npaug ntxiv rau tej uas nws tso tseg lawm, tsis hais vajtse, kwvtij, nkauj muam, niamtxiv, metub menyuam, liajteb, txawm yog li ntawd los nws yuav raug kev tsimtxom thiab, tiam tomntej nws yuav tau txojsia ntev mus ib txhis.

Malakaus 10:42-44

42Yexus hu tagnrho cov thwjtim los cuag nws, nws hais rau lawv hais tias, Nej yeej paub lawm hais tias, Lwm haivneeg tej nomtswv lawv muaj hwjchim tswjhwm lawv tej neeg, thiab cov thawjcoj muaj hwjchim quabyuam sawvdaws. 43Tiamsis nej tsis txhob ua li lawv. Nej cov yog leejtwg xav ua tus hlob, tus ntawd yuav tsum ua sawvdaws tus tubtxib. 44Thiab nej cov yog leejtwg xav ua tus thawj, tus ntawd yuav tsum ua sawvdaws qhev.

Malakaus 11:22-24

22-23Yexus hais rau Petus lawv hais tias, Kuv qhia tseeb rau nej hais tias, yog nej ntseeg Vajtswv tiag, nej hais rau lub roob no kom txav mus hauv hiavtxwv, lub roob yeej yuav txav mus tiag. Yog nej ntseeg hais tias, yuav muaj raws li nej hais, cais yeej yuav muaj li ntawd tiag. 24Twb yog vim li ntawd kuv thiaj hais rau nej hais tias, thaum nej thov Vajtswv pub ib yam dabtsi rau nej, nej yuav tsum ntseeg hais tias, Vajtswv twb pub yam ntawd rau nej lawm. Yog nej ntseeg li ntawd nej yeej yuav tau tiag.

Malakaus 12:25

25 Thaum cov neeg uas tuag lawm sawv rov los, lawv yuav zoo ib yam li cov tubtxib saum qaumntuj, lawv yuav tsis sib yuav lawm.

Malakaus 12:30-31

Vajtswv txoj kevcai nqi twg yog nqi tseemceeb dua ntais huv tibsi? 30 Nej yuav tsum mloog nej tus Vajtswv lus kawg siab kawg ntsws, kawg plab kawg plawv, thiab kawg nej lub dag lub zog (Kevcai 6:4-5). 31Nqi ob kuj tseemceeb thiab. Nqi ntawd hais tias, Nej yuav tsum hlub kwvtij zejzog ib yam li nej hlub nej lub cev (LevisKevcai 19:18).

Tus Tseb Nplej Txhais (Mathais 13: 19 - 23)

19 Cov neeg uas hnov zaj Vajtswv yuav los kav neeg lub siab, tiamsis tsis totaub. Cov neeg ntawd lub siab piv txog txojkev uas noob nplej poob rau. Tiamsis dab ntxwgnyoog los muab tej lus uas tseb rau hauv lawv lub siab txeeb nqa lawm. 20 Cov noob nplej uas poob rau ntawm qhov av uas hauv muaj pobzeb tiv lawm, piv txog cov neeg uas hnov dheev Vajtswv txojlus, lawv zoo siab hlo yuav tamsim ntawd. 21Tiamsis txojlus ntawd txeem mus rau hauv lawv lub siab tsis tob. Lawv lees yuav ib nyuag ntu xwb, thaum lawv raug kev txomnyem lossis kev tsimtxom vim txojlus ntawd, cais lawv txawm thim hlo rov qab lawm. 22Cov noob nplej uas poob rau hauv lub hauvpaus pos, piv txog cov neeg uas hnov Vajtswv txojlus, tiamsis lawv tej kev nyuajsiab, kev ntshaw nyiaj ntshaw txiaj hlob tuaj laum Vajtswv txojlus lawm, txojlus ntawd thiaj tsis txi txiv. 23Cov noob nplej uas poob rau ntawm qhov av zoo, piv txog cov neeg uas hnov Vajtswv txojlus thiab totaub. Cov neeg ntawd ib txhia txi tau ibpuas lub, ib txhia txi tau raucaum lub, thiab ib txhia txi tau pebcaug lub.

Txhais zaj Nplej thiab Txhauv (Mathais 13: 37 - 43)

Zaj Nplej thiab Txhauv nyob rau: (Mathais 13:24-30) 37Yexus qhia hais tias, Tus uas tseb cov noob nplej zoo ntawd, nws yog Neeg Leejtub. 38Daim teb ntawd yog lub ntiajteb no. Cov noob nplej zoo yog cov neeg uas Vajtswv kav lawm. Cov txhauv yog cov neeg uas dab ntxwgnyoog kav. 39Thiab tus yeebncuab uas tuaj tseb cov noob txhauv ntawd twb yog dab ntxwgnyoog ntag. Lub caij hlais yog lub sijhawm ntiajteb kawg. Cov neeg hlais yog cov tubtxib saum qaumntuj. 40Lub sijhawm ntiajteb kawg yuav zoo ib yam li thaum lawv sau cov txhauv los pov hlawv. 41Neeg Leejtub nws yuav txib nws cov tubtxib saum qaumntuj tawm mus sau cov neeg uas ua rau lwm tus yuamkev ua txhaum, thiab sau cov neeg uas ua phem huv tibsi tawm hauv cov neeg uas Vajtswv kav lawm mus. 42Cov tubtxib saum qaumntuj yuav muab cov neeg ntawd pov rau hauv lub cubtawg uas cig hlob hlob. Lawv yuav quaj qw tom hniav qees hauv. 43Thaum ntawd Vajtswv haivneeg yuav ci ntsa iab ib yam li lub hnub hauv Leejtxiv lub tebchaws. Yog leejtwg muaj pobntseg cia li khaws zaj no cia.

Mathais 13:49-50

49 Thaum lub sijhawm ntiajteb kawg yuav zoo li hais no: Cov tubtxib saum qaumntuj yuav tawm mus muab cov neeg ua phem rho tawm hauv cov neeg zoo, 50 mus pov rau hauv lub cubtawg uas cig hlob hlob, lawv yuav quaj qw tom hniav qees hauv.