• Yau-as tus tub Amaxiyas sawv ua vajntxwv hloov nws chaw. (2 vajntxwv 12:21) • Thaum Yehau-ahas tus tub Yehau-as ua vajntxwv kav Ixayees tebchaws tau ib xyoos, xyoo ob Yau-as tus tub Amaxiyas sawv ua vajntxwv kav Yudas tebchaws. 2Thaum ntawd Amaxiyas hnubnyoog muaj neesnkaum tsib xyoos. Nws nyob hauv lub nroog Yeluxalees kav tau neesnkaum cuaj xyoos. Nws niam npe hu ua Tsehau-adis uas yog cov neeg nyob hauv lub nroog Yeluxalees. (2 vajntxwv 14:1- 2) • 17Thaum vajntxwv Yehau-as tus uas kav Ixayees tebchaws tuag lawm, vajntxwv Amaxiyas tus uas kav Yudas tebchaws tseem ua neej nyob kaumtsib xyoos ntxiv. 18Lwm yam haujlwm uas Amaxiyas ua, luag muab teev tseg cia rau hauv phau ntawv npe hu ua, cov neeg Yudais tej vajntxwv lub keebkwm. (2 vajntxwv 14:17-18)

• 21Cov neeg Yudais tsa Amaxiyas tus tub Uxaiyas sawv ua vajntxwv. Thaum ntawd Uxaiyas hnubnyoog muaj kaumrau xyoo. 22Thaum Uxaiyas txiv tuag lawm, Uxaiyas txeeb tau lub nroog Elathas, thiab rov kho lub nroog ntawd dua tshiab. (2 vajntxwv 14:21) • Thaum Yelaunpau-as ob ua vajntxwv kav Ixayees tebchaws tau neesnkaum rau xyoo, xyoo neesnkaum xya Amaxiyas tus tub Uxaiyas sawv ua vajntxwv kav Yudas tebchaws. 2Thaum ntawd Uxaiyas hnubnyoog muaj kaumrau xyoo. Nws nyob hauv lub nroog Yeluxalees kav tau tsibcaug ob xyoos. Nws niam npe hu ua Tsekhaulaiyas uas yog cov neeg nyob hauv lub nroog Yeluxalees. (2 vajntxwv 15:1-2) • 6 Lwm yam haujlwm uas Uxaiyas ua luag muab teev tseg cia rau hauv phau ntawv npe hu ua cov neeg Yudais tej vajntxwv lub keebkwm. 7Uxaiyas tuag, luag muab nws lub cev faus rau hauv tej vajntxwv lub toj ntxas hauv Daviv lub nroog. Nws tus tub Yauthas sawv ua vajntxwv hloov nws chaw. (2 vajntxwv 15:6-7)

• 32Thaum Lemaliyas tus tub Npekhas ua vajntxwv kav Ixayees tebchaws tau ib xyoos, xyoo ob Uxaiyas tus tub Yauthas sawv ua vajntxwv kav Yudas tebchaws. 33Thaum ntawd Yauthas hnubnyoog muaj neesnkaum tsib xyoos. Nws nyob hauv lub nroog Yeluxalees kav tau kaumrau xyoo. Nws niam yog Zados tus ntxhais npe hu ua Tselusas. (2 vajntxwv 15:32-33) • 37Lub sijhawm Yauthas tseem ua vajntxwv kav tebchaws, tus TSWVkom vajntxwv Lexees tus uas kav Xilias tebchaws, thiab vajntxwv Npekhas tus uas kav Ixayees tebchaws tuaj tua Yudas tebchaws. Zaum no yog thawj zaug uas Vajtswv tso yeebncuab tuaj tua Yudas tebchaws. 38Yauthas tuag, luag muab nws lub cev faus rau hauv tej vajntxwv lub toj ntxas hauv Daviv lub nroog. Nws tus tub Ahas sawv ua vajntxwv hloov nws chaw. (2 vajntxwv 15:37-38)

• Thaum Lemaliyas tus tub Npekhas ua vajntxwv kav Ixayees tebchaws tau kaumrau xyoo, xyoo kaumxya Yauthas tus tub Ahas sawv ua vajntxwv kav Yudas tebchaws. 2Thaum ntawd Ahas hnubnyoog muaj neesnkaum xyoo. Nws nyob hauv lub nroog Yeluxalees kav tau kaumrau xyoo. Nws coj nws tus cujpwm tsis zoo li nws yawgkoob vajntxwv Daviv tus, nws ua tej uas tsis haum tus TSWV uas yog nws tus Vajtswv siab. 3Nws coj cujpwm raws li tej vajntxwv uas kav Ixayees tebchaws coj. Tsis Yog li ntawd, xwb, nws tseem muab nws tus tub tua hlawv txi tej mlom raws li tej kevcai phem uas cov neeg uas Vajtswv ntiab khiav tawm hauv tebchaws mus, thaum ib tsoom neeg Ixayees los txeeb nyob hauv lub tebchaws ntawd ua. 4Ahas tua tsiaj, thiab hlawv xyab txi dab txi mlom hauv tej qhovchaw pe dabqhuas saum tej roob, thiab hauv tej qabntoo loj. (2 vajntxwv 16:1-4) • 19Lwm yam haujlwm uas vajntxwv Ahas ua luag muab teev tseg cia rau hauv phau ntawv npe hu ua cov neeg Yudais tej vajntxwv lub keebkwm. 20Ahas tuag, luag muab nws lub cev faus rau hauv tej vajntxwv lub tojntxa hauv Daviv lub nroog. Nws tus tub Hexekhaiyas sawv ua vajntxwv hloov nws chaw. (2 vajntxwv 16:19-20)

• Thaum Elas tus tub Hause-as ua vajntxwv kav Ixayees tebchaws tau ob xyoos, xyoo peb Ahas tus tub Hexekhaiyas sawv ua vajntxwv kav Yudas tebchaws. 2Thaum nws sawv ua vajntxwv nws hnubnyoog muaj neesnkaum tsib xyoos, nws nyob hauv lub nroog Yeluxalees kav tau neesnkaum cuaj xyoos. Nws niam yog Xekhalaiyas tus ntxhais npe hu ua Anpiyas. (2 vajntxwv 17:1-2) • 20Lwm yam haujlwm uas vajntxwv Hexekhaiyas ua, tej uas nws ua siab tawv ua, tej uas nws tauv pasdej thiab khawb kwj rau dej ntws los hauv nroog, luag muab teev tseg cia rau hauv phau ntawv npe hu ua cov neeg Yudais tej vajntxwv lub keebkwm. 21Hexekhaiyas tuag, nws tus tub Manaxes sawv ua vajntxwv hloov nws chaw. (2 vajntxwv 20:20-21)

• Thaum Manaxes sawv ua vajntxwv kav Yudas tebchaws, nws hnubnyoog muaj kaum ob xyoos. Nws nyob hauv lub nroog Yeluxalees kav tau tsibcaug tsib xyoos. Nws niam npe hu ua Hezinpas. (2 vajntxwv 21:1) • 17Lwm yam haujlwm uas Manaxes ua, thiab nws tej kev txhaum luag muab teev tseg cia rau hauv phau ntawv npe hu ua cov neeg Yudais tej vajntxwv lub keebkwm. 18Manaxes tuag, luag muab nws lub cev faus rau hauv Uxas lub vaj uas nyob npuab vajntxwv tsev. Nws tus tub Amos sawv ua vajntxwv hloov nws chaw. (2 vajntxwv 21:17-18)

• 19 Thaum Amos sawv ua vajntxwv kav Yudas tebchaws, nws hnubnyoog muaj neesnkaum ob xyoos. Nws nyob hauv lub nroog Yeluxalees kav tau ob xyoos. Nws niam yog Halus tus ntxhais Mesulemes, lawv yog cov neeg uas nyob hauv lub nroog Tsonpas. 20 Amos ua txhaum tawmtsam tus TSWV ib yam nkaus li nws txiv Manaxes ua. (2 vajntxwv 21:19-20) • 25Lwm yam haujlwm uas Amos ua luag muab teev tseg cia rau hauv phau ntawv npe hu ua cov neeg Yudais tej vajntxwv lub keebkwm. 26Luag muab Amos lub cev tuag faus rau hauv lub toj ntxas hauv Uxas lub vaj. Amos tus tub Yauxaiyas sawv ua vajntxwv hloov nws chaw. (2 vajntxwv 21:25-26)

• Yauxaiyas sawv ua vajntxwv kav Yudas tebchaws thaum nws hnubnyoog muaj yim xyoo. Nws nyob hauv lub nroog Yeluxalees kav tau pebcaug ib xyoos. Nws niam npe hu ua Yedidas uas yog Adayas tus ntxhais. Adayas yog cov neeg nyob hauv lub nroog Npaukhas. 2Yauxaiyas coj lub neej raws li tus TSWV lub siab nyiam, thiab nws ua raws nraim li Vajtswv tej kevcai txhua lo huv tibsi ib yam li nws yawgkoob Daviv ua. (2 vajntxwv 22:1-2) • Tomqab ntawd, cov neeg Yudais xaiv Tsauahas uas yog Yauxaiyas tus tub, thiab tsa nws ua vajntxwv sawv nws txiv chaw. (2 vajntxwv 23:30)

• 31Thaum Tsau-ahas sawv ua vajntxwv kav Yudas tebchaws, nws hnubnyoog muaj nees-nkaum peb xyoos. Nws nyob hauv lub nroog Yeluxalees kav tau peb hlis. Nws niam yog Yelemis tus ntxhais Hamuthas, lawv yog cov neeg uas nyob hauv lub nroog Linas. 32Nws ua txhaum tawmtsam tus TSWV ib yam nkaus li nws tej pojkoob yawmtxwv ua. 33Nws lub meejmom vajntxwv poob thaum vajntxwv Nekaus tus uas kav Iyiv tebchaws tuaj ntes tau nws, coj mus ua cevqhev hauv lub nroog Lilas pem Hamas tebchaws. Vajntxwv Nekaus yuam cov neeg Yudais them 3,400 kilau nyiaj, thiab 34 kilau kub ua nqi se rau vajntxwv Nekaus. 34Vajntxwv Nekaus tsa Yauxaiyas tus tub Eliyakhees ua vajntxwv kav Yudas tebchaws hloov Yauxaiyas chaw, thiab tis npe tshiab rau Eliyakhees hu ua Yehauyakhees. Vajntxwv Nekaus coj Tsau-ahas mus nyob tim Iyiv tebchaws, nws tuag rau tid. (2 vajntxwv 23:31-34)